Бугарија не е во состојба да ја одобри преговарачката рамката во сегашната форма, вели Захариева

Добивај вести на Viber

Не ни е целта да ја блокираме, напротив 30 години сме и помагале на Македонија, вели шефицата на дипломатијата на Бугарија, Екатерина Захариева. 

Таа за БГНЕС вели дека Договорот за пријателство меѓу Бугарија и Македонија ги има сите гаранции да се применува во добра волја и од двете страни. 

„За жал, нашата оценка е дека тоа не е така. И покрај многу шпекулации во медиумите, особено во Република Македонија – ниту сме барале промена на Уставот, ниту имаме нови барања, ниту пак сме го оспорувале правото на самоопределување на секој граѓанин, вклучително и на граѓаните на Република Македонија, ниту правото да го нарекуваат јазикот како што сакаат“, вели Захариева.

Захариева вели дека онлајн тимовите на министерствата за надворешни работи помеѓу двете земји се во постојана комуникација за решавање на преостанатите прашања.

Потсети дека на седницата на 10 ноември на Советот за заеднички работи треба да се одобри Преговарачката рамка, но тоа, според неа, не е конечен датум.

За рамката, Захариева оцени дека Бугарија не е во состојба да ја одобри рамката во нејзината сегашна форма, во која е претставена.

Бугарија не може да ги промени своите позиции затоа што има декларација на Парламентот и одлука на Влада. Тоа што се говори внатре во ЕУ е проблем на Унијата и тоа е проблем на Брисел, а не наш проблем тука, изјави бугарскиот амбасадор во земјава Ангел Ангелов.