БУГАРСКИОТ АМБАСАДОР ЗАДОВОЛЕН ОД ПОПИСОТ: Албанија е најпријателската и најгостопримлива земја за Бугарија

Добивај вести на Viber

Бугарија е задоволна од пописот во Албанија. 

Бугарскиот амбасадор во Тирана, Ивајло Киров, изрази задоволство од пописните резултати според кои во Албанија живеат 7.057 лица со бугарска националност, јави Ора њуз.

Амбасадорот Ивајло Киров при денешната посета на северниот албански град Кукс, каде учествувал во активност за бесплатни здравствени прегледи на жителите на овој град од страна на бугарски лекари изразил „благодарност за сработеното, но и за почитувањето на правата на малцинството”.

Додал дека со „овој процес се создале хармонични услови за жителите со бугарско потекло слободно да ја изразат својата етничка припадност”.

„Албанија е најпријателската и најгостопримлива земја за Бугарија и за Балканот“, изјавил Киров. 

Оценил дека  „ова е една од причините зошто албанската држава преговара со ЕУ”.

„Многу е важно албанската држава да го прикаже бројот на населението, бројот на станови бидејќи врз основа на овие податоци ќе биде распределбата на албанските претставници во ЕУ и приходите што Албанија може да ги апсорбира од фондовите на ЕУ. Морам да нагласам дека пописот во Албанија е надгледуван од претставници на ЕУ и други заинтересирани земји“, посочил бугарскиот дипломат. 

Македонските здруженија реагираа дека Бугарите пред и за време на пописот ги посетуваа селата населени со Македонци и нуделе пасоши, студии во Бугарија, телефони. 

И грчко здружение реагира за бројот на православни во Албанија.