Добивај вести на Viber
Царинските службеници на Ќафасан спречија обид за шверц на 50 тони дизел гориво декларирано како базно масло, а кое било транспортирано во две цистерни. Против сторителите се поднесени кривични пријави до Јавно обвинителство.
Цистерните пристигнале на граничниот премин Ќафасан и се пријавиле за транзит. Испраќач на стоката е фирма од Албанија, а примач фирма од Република Северна Македонија. Поради сомневање во поднесената документација и видот на декларираната стока, товарните моторни возила се задржани за понатамошна контрола.
Земени биле мостри за лабораториско испитување, а од добиените резултати од направената лабораториска анализа, како и од извозните документи добиени во соработка со албанскатата царинска администрација, е констатирано дека во двете товарни моторни возила, наместо декларираното базно масло, има дизел гориво за кое увозните давачки во Република Северна Македонија се поголеми, односно дека е направен обид за избегнување на давачки во поголем износ при увоз на акцизна стока.
„Вредноста на вкупната количина на дизел горивото во двете цистерни изнесува 3.121.626 денари за што царинските давачки изнесуваат 1.745.327 денари. Возилата и горивото се привремено одземени и против сторителите се покренати соодветни судски постапки за кривично дело царинска измама по член 278а од Кривичниот закон“, соопшти Царинската управа.