Царината фати две Романки со 12 килограми марихуана на Ќафасан

Добивај вести на Viber

Две Романки биле фатени на граничниот премин Ќафасан во обид да прошверцуваат 12 килограми на марихуана во Република Македонија, а дрогата се наоѓала во нивното патничко возило со италијански  регистарски ознаки.

Лицата од цариниците на англиски јазик биле прашани што имаат да пријават за царинска контрола, при  што одговориле дека немаат ништо за пријавување  и дека се враќаат за Романија од неколкудневен престој во Албанија. Поради сомневање во нивните изјави возилото заедно со патниците било селектирано за контрола.

При прегледот на возилото биле пронајдени вкупно 27 пакетчиња (6 во задниот браник, 8 во задното лево крило, 7 во задното десно крило, 3 во левиот страничен праг и 3 во десниот страничен праг) – црни ќесички обвиткани со проѕирна салотејп лента наполнети со марихуана со вкупна тежина од 12 килограми.

Против сторителите, Царинската управа поднесе кривична пријава за сторено кривично дело „неовластено производство и пуштање во промет на наркотични дроги психотропни супстанции и прекурсори“ до надлежното јавно обвинителство, а судија во претходна постапка им одреди мерка притвор во траење од 30 дена.

Во изминатите десет дена ова е четврт случај на спречен обид за шверц на дрога при што запленети се 56,5 килограми марихуана.