Членовите на избирачките одбори не се плашат од коронавирусот
Објавено во: Македонија 29 Јуни, 2020
Оливер Дерковски, претседателот на Државната изборна комисија, денеска изјави дека до сега имало многу малку барања од членовите на избирачките одбори, кои главно доаѓаат од администрацијата, за нивно изземање во пресрет на предвремените парламентарни избори на 15 јули.
Претходно, особено во периодот пред дефинирањето на изборниот датум, постоеја гласини дека голем број на членови на избирачките одбори барале да не ги спроведуваат овие избори поради епидемијата, односно поради тоа што преку целиот ден ќе треба да бидат во контакт со гласачи.
- Засега можам да кажам дека нема барање за изземање на членовите од избирачки одбори. Може да отсуствуваат само поради сериозни здравствени проблеми и хронична болест, или поради сериозни семејсни причини но само ако докажат., рече Дерковски на денешната прес-конференција.
Првиот човек на ДИК најави дека во среда ќе се заклучи избирачкиот список со околу 1,814.000 гласачи, а нема да има гласањево дијаспората, поради недоволен број на пријавени гласачи. Дерковски додаде и дека дислоцирани се голем број на избирачки места, кои според протоколот не ги задоволуваат критериумите за квадратура и проветреност.
- Мал дел приватни објекти ние ќе ги закупуваме, бидејќи во некои рурални средини јавните објекти не ги задоволуваат новите критериуми за гласање, наведе Дерковски.