ЦИВИЛ регистрирал кршење на молкот - за кои општини има реакции?

Добивај вести на Viber

Од невладината ЦИВИЛ регистрирале повеќе прекршувања на изборниот молк.

Од почетокот на изборниот молк, до ЦИВИЛ стасале околу триесет извештаи од изборните набљудувачи, како и десетина пријави од граѓани, за кршење на изборниот молк и притисоци врз гласачите.

„Во една општина, директорот на училиштето му забранил на еден вработен, тој и целото негово семејство, да се појави на гласање утре. Според ова сведоштво, тој „не бил сигурен гласач“. На расправијата меѓу директорот и вработениот, присуствувале и други вработени во институцијата“ - велат од ЦИВИЛ.

Од ЦИВИЛ сметаат  дека политичките партии се однесуваат слично, ако не и полошо во споредба со претходните изборни процеси.

„Во село Подареш, општина Радовиш, во тек е изградба на пат, што претставува кршење на изборниот молк. Иста ситуација е нотирана и во село Миравци, општина Гевгелија.Вработени во една скопска општина во моментов организирано се јавуваат кај гласачите и вршат агитација и притисок.Во село Матејче, општина Липково, прекршен е  изборниот молк од страна на две политички партии во ова село.Во текот на изборниот молк, во населбата Маџари, скопско, се појавил печатен материјал со црна кампања против еден од носителите на кандидатски листи“ - кажаа од ЦИВИЛ

Набљудувачите на ЦИВИЛ регистрирале и нерегуларности во Кичево каде што велат дека во Општинската изборна комисија владее хаос и дека на некои членови на Избирачките одбори не им е дозволен пристап до просториите каде што се средува изборниот материјал. Велат не се знае кои болни и изнемоштени ќе гласаат, а постојат и индиции дека се гласа во име на друг.