ЦКБ БАНКА ИЗДАВА КОНВЕРТИБИЛНИ ОБВРЗНИЦИ НА СУМА ОД 6 МИЛИОНИ ЕВРА - кој сака ќе може да ги претвори и во акции, ова се условите

Добивај вести на Viber

На 25 јануари идната година ќе се одржи вонредна седница на Собранието на акционери на Централна кооперативна банка. 

Се очекува акционеритена банката да ја изгласаат одлуката за издавање на долгорочни должнички хартии од вредност - конвертибилни обврзници, по пат на јавна понуда. Ова всушност ќе биде втора емисија на обврзници на оваа банка. 

Сумата на конвертибилните обврзници ќе иснесува 6 милиони евра. 

Дел од издадените конвертибилни обврзници во износ од 5.000.000 евра ќе се користи за предвремено исплаќање на претходно издадената прва емисија долгорочни должнички хартии од вредност - конвертибилни обврзници, а останатиот дел од 1.000.000 евра ќе се користи за предвремено исплаќање на претходно искористен субординиран долг во износ од 1.000.000 евра, спроведени на начин, пропишан со Одлуката на НБРСМ за методологијата за утврдување на адекватноста на капиталот.

Долгорочните должнички хартии од вредност - конвертибилни обврзници се неограничено преносливи, во нематеријализиран облик и гласат на име. Долгорочните должнички хартии од вредност - конвертибилни обврзници носат право на камата. Опцијата за конвертирање му дава право на имателот на обврзниците да ги конвертира обврзниците во обични акции со право на глас, на негово барање. Конверзијата на обврзниците во акции ќе се изврши на тој начин што ќе се земе цел дел од количникот на номиналната вредност на вкупните обврзници, предмет на конверзија и цената на конверзија 41.2069 ЕУР. Остатокот од тој количник помножен со 41.2069 ЕУР ќе се исплати на барателот на конверзија во денари по среден курс на НБРМ за евра на денот на исплатата, во рок од 3 дена по истекот на рокот на достасување на обврзницата.

Номинална вредност на долгорочните должнички хартии од вредност - конвертибилни обврзници што се издаваат  ќе биде 100.000 ЕУР по лот – по обврзница. 

Долгорочните должнички хартии од вредност - конвертибилни обврзници ќе се понудат со цена за лот од 100.000 ЕУР во денарска противвредност.

Рокот на доспевање е девет години од денот на настанатиот прилив на парични средства на сметка на банката.

Целта поради која се издаваат конвертибилните обврзници е зајакнување на вкупниот финансиски капацитет на Банката, со што таа планира да ги оствари поставените бизнис цели утврдени во Деловната политика на Банката за 2025 година, Финансискиот план за 2025 година и Развојниот план за период од 2025 година до 2028 година, како и дополнително зголемување на капиталот на Банката и обезбедување на оптимална адекватност на капиталот во наредниот период. 

Обврзниците нема да бидат гарантирани, ниту се покриени со друг вид обезбедување од страна на Банката или лице поврзано со неа. 

Долгорочните должнички хартии од вредност - конвертибилни обврзници се со годишна каматна стапка од 2,2 отсто, фиксна за целиот период. Исплатата на каматата ќе се врши во денарска противвредност по среден курс на НБРСМ за евра на денот на исплатата, еднаш годишно, сметано од денот на настанатиот прилив на парични средства по основ на уплата на конвертибилните обврзници во Банката. 

Н.Н.Ф.