ДАНСКАТА ПРЕМИЕРКА САКА ДА РАЗГОВАРА СО ТРАМП: Не верува дека со сила ќе го преземе Гренланд

Добивај вести на Viber

Властите во Данска сепак не веруваат дека американскиот претседател Доналд Трамп ќе го заземе Гренланд. 

Данската премиерка Мете Фредериксен изјави дека не верува дека Трамп би се обидел да го заземе Гренланд со сила.

„Немаме причина да веруваме дека тоа ќе се случи“, рече данската премиерка.

Фредериксен додаде дека се обидува да воспостави разговори со новоизбраниот американски претседател Доналд Трамп за неговите изјави за преземање контрола врз Гренланд.

„Гренланд им припаѓа на Гренланѓаните“, рече Фредериксен. 

Таа вели дека Данска е отворена за дискусии за американските интереси на Арктикот, пренесува „Анадолија“. Претходно, Фредериксен се сретна со лидерите на политичките партии во данскиот парламент, вклучително и двајца претставници од Гренланд, за да ги информира за начинот на кој владата се справува со настаните.

Трамп, чија инаугурација е закажана за 20 јануари, повторно го иницира контроверзното прашање на платформата Truth Social.

„Гренланд е неверојатно место и луѓето ќе имаат огромна корист ако и кога ќе стане дел од нашата нација. Ќе го заштитиме од многу злобниот надворешен свет. Направете го Гренланд повторно голем“, напиша Трамп.

Данскиот министер за надворешни работи Ларс Локе Расмусен изјави во средата дека островот нема амбиции да стане сојузна држава во рамките на САД.

Портпаролот на Кремљ Дмитриј Песков го коментираше предлогот на новоизбраниот американски претседател Доналд Трамп за анексија на Гренланд, повлекувајќи паралели меѓу тој план и руската анексија на неколку украински региони.

Песков на новинарите им кажа дека Трамп би требало да ја земе предвид волјата на жителите на Гренланд, повлекувајќи паралела со рускиот став кон жителите на регионите кои Русија ги припои.