ДЕЛ ОД СРПСКИТЕ ТУРИСТИ ВО ГРЦИЈА ЌЕ ОДАТ ПРЕКУ БУГАРИЈА: Дојранчани се плашат дека ќе ги изгубат гостите

Добивај вести на Viber

Бугарија влезе во Шенген зоната на 1 јануари 2025 година, се укинаа граничните контроли меѓу Бугарија и Грција, а со тоа дел од српските туристи ќе ја заобиколат Македонија на пат кон Грција. Направена е анкета која покажа дека дел од Србите уште се мислат дали ќе патуваат преку Македонија или преку Бугарија за да стигнат до грчките плажи.

Анкета која ја направи српски портал покажала дека 40 отсто од испитаниците се заинтересирани да патуваат преку Бугарија, додека 20 отсто рекле дека ќе одлучат во зависност од состојбата на граничните премини. Сепак, 30 отсто одговориле дека и натаму ќе ја користат македонската рута.

„Ние работевме 100 отсто со Срби. Си резервираа преку booking. Само две фамилии Maкедонци ми дојдоа преку лето. Ќе дојдат и сега дел од српските гости, тие што доаѓале претходно, а за нови тешко.  Нови гости Срби нема шанси да дојдат, не верувам. Ние самите си го направивме тоа. Си даваме некоја слобода. Се жалеа луѓето за патот. Второ, нема сообраќајни знаци, луѓето се малтретираат, се нервираат. Во лето се случувало преку еден ден вода да нема. Тоа си влијае. Треба и хигиената да се подобри. Не бива така, никој пари не фрла. Нека е и поскапо, ама да му пружиш услуга. Ни Србите не се богати, може се малку подобри од нас, ама секој си бара соодветна услуга“, вели сопственик на вила во Дојран.

Дојранчани објаснуваат дека градот треба повеќе да се промовира како туристичко и транзитно место.

„Некоја традиционална врска имаме со Србите.  Доаѓаат, преспиваат, се одмораат. На преминот Дојрани нема гужви, тоа им одговара. Гастрономијата е добра, езерото е убаво. Мислам дека нема да се случи одлив, но треба да бидеме будни и да се промовираме. Сега Србите букираат за надвор од сезона, веќе има букирања. Може ќе има некој одлив, но нема да биде значително многу според мене, а дали ќе биде така, ќе видиме. Треба да продолжиме со промоција на Дојран како транзитно место. А има и Бугари, на кратко доаѓаат, посебно надвор од сезона. Присутни се бугарските туристи, а српските доаѓаат од јуни до септември“, додава Роза Режак, сопственичка на вила.

Жителите објаснуваат дека имало случаеви кога српските туристи престојувале во градот на пат кон Грција, а на враќање пак доаѓале во Дојран.

„Мислам дека ќе има промени. Србите претходно доаѓаа во Дојран и во Гевгелија“, објаснува Рушка Газетиќ, која издава апартман.

Опцијата преку Бугарија ќе биде поволна за оние кои патуваат со сопствено возило, а за автобуските тури, посебно за оние кои се од јужна Србија се смета дека и натаму ќе патуваат преку Македонија. Оние од Ниш, Лесковац преку Табановце и Богородица планираат да стигнат до Грција. Турците и Србите според податоците од Државниот завод за статистика(ДЗС) се најбројни гости во Македонија. 

фото Википедија/Деан Лазаревски