СТУДЕНТСКИ ОБРОК ЗА 160 ДЕНАРИ ИЛИ МЕРКАТА ДА ОПФАТИ ПОГОЛЕМ БРОЈ СТУДЕНТИ? Што ќе одлучат идните академски граѓани

Добивај вести на Viber

Субвенционираниот студентски оброк е повторно во фокусот на јавноста, откако беше предложено зголемување од 140 на 160 денари дневно. Оваа иницијатива, која има за цел да им помогне на студентите да ги покријат дел од своите трошоци за исхрана, отвори широки дискусии и јавна дебата за тоа што е поважно: повисок износ или поголем опфат на субвенцијата?

Според Владата, во буџетот на Министерството за образование и наука (МОН) за оваа година се обезбедени средства за покачување на студентскиот оброк од 140 на 160 денари дневно, но студентите ќе одлучат дали повеќе сакаат да се реализира ова зголемување или пак да се прошири опсегот на студенти кои земаат оброк.

Студентите имаат поделени ставови за тоа што треба да биде приоритет. Некои веруваат дека зголемувањето на износот е неопходно за да се одговори на растечките цени, додека други сметаат дека е поважно субвенцијата да биде достапна за сите студенти, вклучувајќи ги оние што работат и оние на втор циклус студии.

Министерството за образование и наука уверува дека средства во буџетот има, но крајната одлука ќе зависи од студентите, кои преку јавна дебата треба да го утврдат својот приоритет.

„Со сегашните цени, и 160 денари се на граница за да можеме да си дозволиме оброк кој ќе биде доволен и квалитетен. Многу од нас се во ситуација каде што мораат да прават компромиси со исхраната. Зголемувањето на субвенцијата би било од огромна помош, особено за студентите кои доаѓаат од други градови и имаат дополнителни трошоци за сместување. За нас, ова не е само прашање на удобност, туку на основна поддршка, вели Јана, студентка на ФЕИТ “

Но, не сите студенти го делат истото мислење.  Од друга страна, Филип, студент на Филозофскиот факултет кој работи со скратено работно време, има поинаков став.

„Не е само прашање колку пари ќе добиеме, туку кој ќе ги добие. Јас работам, но тоа не значи дека немам потреба од субвенциониран оброк. Имам доволно трошоци поврзани со факултетот и животот во градот, и секоја дополнителна поддршка ми е значајна. Важно е сите студенти да бидат опфатени – без разлика дали работат или се на втор циклус. Еднаквоста е клучна, а субвенцијата треба да биде правично распределена.“

Додека мислењата се поделени, Министерката за образование, Јаневска, минатата недела увериа дека буџетот на Министерството за образование и наука (МОН) е доволен за да се реализира кој било од двата предлога.

„Студентите ќе одлучат дали сакаат зголемен износ на оброкот или проширен опфат на субвенцијата. Средства има, а приоритетите ќе се утврдат преку јавната дебата што ја организираат самите студенти,“ изјави министерката.

Јавната дебата, која се одржува деновиве, ќе биде од клучно значење за одлуката. Според организаторите, целта е да се изнајде решение кое ќе ги задоволи различните потреби на студентите, без да се направат компромиси на нивната добросостојба.

Дискусијата за субвенционираниот студентски оброк не е само прашање на финансии – таа го отсликува прашањето за еднаквост и поддршка за сите студенти, без разлика на нивниот статус. Оваа дебата покажува дека студентите сакаат да имаат активен глас во креирањето на политиките што директно ги засегаат.

Анита Буховски