Денационализацијата ќе нè чини уште 30 милиони евра, Министерството за финансии ќе издава нови обврзници

Добивај вести на Viber

Минатата година министерот за финансии Зоран Ставрески  јавно го затвори процесот на денационализација со податокот дека во првосилна постапка биле решени вкупно 30.744 барања, а дека околу 3.000 решенија биле во жалбена постапка. Сега Министерството за финансии преку измени на Законот за издавање на обврзници објавува дека денационализацијата всушност не е целосно завршена и за неа ќе треба да плаќаме до 2025 година. Новите податоци покажуваат дека од 2000 до 2007 година, вкупно биле поднесени 30.744 барања за денационализација, но од нив правосилни се само 25.957 предмети. Останатите 4.787 предмети се вратени во повторна постапка. За нив, откако ќе станат правосилни, Министерството за финансии ќе издава дополнително две нови емисии на обврзници во вкупна вредност од 30 милиони евра. „Донесувањето на Законот за изменување на Законот за издавање на обврзници за денационализација е со цел зголемување на бројот на емисии на обврзници за денационализација од дванаесет на четиринаесет, како би можело да се опфатат предметите за денационализација по кои се одлучува во повторна постапка, а за кои е потребно дополнително издавање на обврзници. Исплатата на обврзниците ќе се врши започнувајќи од 2015 година во наредните десет години“, пишува во предлог законот за издавање обврзници доставен до Собранието. Почнувајќи од 2001 година, државата еднаш годишно издаваше по една емисија обврзници за денационализација. Дванаесетата, која беше најавувана како последна емисија на обврзници беше издадена пред само еден месец во вредност од 13 милиони евра. Истата државата ќе ја плаќа до 2023 година а заклучно со неа, обештетени се околу половина милион граѓани вклучени во процесот, кои за својот одземен имот пред 60 години, во имот или преку вредносни хартии добија околу 300 милиони евра. Според статистиката на првостепените комисии за денационализација, најголем дел од предметите, односно над 15.000 се решени во периодот 2007-2012 година. Со законски измени државата си дозволи наместо да врати земјиште, да плаќа надомест Законот за денационализација почна да се спроведува во мај 2000 година, но решавањето на предметите не одеше глатко. Илјадници предмети беа заглавени затоа што поради големиот период од одземањето на имотот не можеа лесно да обезбедат веродостојна документација. Дури и кај Народниот правобранител, најголемиот број претставки се однесуваа токму на постапката за денационализација. Во меѓувреме, Владата го смени законот за денационализација и овозможи наместо да врати земјиште, доколку оцени дека на зејиштето може да се градат добра од општ инетерес, да врати пари. Па така, на голем број граѓани наместо да им бидат вратени згради, куќи или земјиште, добија обврзници од државата. С.Н