Денеска завршни зборови за случајот „Насилство во Центар“

Добивај вести на Viber

Судењето за насилствата пред Општина Центар во јуни 2013 година продолжува денеска со завршни зборови на одбраната. На минатонеделното рочиште завршни зборови дадоа Обвинителството и одбраната на обвинетите Никола Груевски и Александар Трајковски.

Адвокатот Јовица Страшевски, бранител на обвинетиот Трајковски, во завршен збор пред Судот рече дека Обвинителството во ниту еден момент не го докажало делото насилство и побара ослободување.

Обвинителката Фатиме Фетаи во завршен збор побара од Судот казните за поттикнувачите на насилствата пред Општина Центар, Никола Груевски и Миле Јанакиески да бидат најстроги за да се одвратат сите други од такви намери во иднина. Адвокатот по службена должност, на првообвинетиот Никола Груевски, рече дека целото дело се докажува само со еден разговор што, како што рече тој, е нелегално прибавен.

Процесот го води судијата Душко Јосифовски. Обвинителството на почетокот се откажа од гонење за лицата Даниела Рангелова, Милан Андонивски и Борче Богдановски.

Со денешните завршни зборови за настаните пред Општина Центар конечно завршува овој случај.  Адвокатот Еленко Миланов, бранител на Миле Јанакиески, тврдеше дека поднесувањето на ново обвинение е поради тоа што поранешниот министер за транспорт и врски успеал да ги оспори сите докази на Обвинителството. Доколку немало ново обвинение, според адвокатот, Јанакиески ќе требаше да биде ослободен од вина.