ДЕСНИЧАРСКИОТ ГЕРБ НА БОЈКО БОРИСОВ ПОБЕДНИК НА ИЗБОРИТЕ ВО БУГАРИЈА: „Со ваква победа можеме да прифатиме компромис“

Добивај вести на Viber

Десничарската партија ГЕРБ на поранешниот премиер Бојко Борисов е победник на вчерашните парламентарни избори во Бугарија, според кои партијата освоила 25 отсто од гласовите, што е за околу 10 отсто повеќе од реформската коалиција на партијата Продолжуваме со промените и десничарската демократска Бугарија.

„Од денеска па натаму – посветени сме на формирање влада. Со ваква победа можеме да прифатиме компромис, но нема да го заобиколиме гласот на народот. Нашата агенда ќе биде фундаментална за идната влада“, рече Борисов.

Тој им се заблагодари на Бугарите за големата излезност.

„Со ваков одговор можеме помирно да зборуваме за тоа како новиот парламент ќе ја претставува волјата на народот“, рече Борисов, пренесува бугарската агенција БТА.

„До утре наутро може да се случат многу промени, освен кој ќе биде јасен победник. Парламентот е математика. Бројот на партии е од огромно значење. Ако влезат сите овие партии, веќе знам дека влада нема да има“, рече Борисов коментирајќи ги првичните резултати.

Конечните резултати се очекуваат денеска, а доколку прелиминарните податоци се покажат точни, Борисов ќе добие мандат да ја формира својата четврта влада, но ќе мора да влезе во коалиција за да формира кабинет.

Политичките аналитичари прогнозираат дека и овие резултати, кои значително не се разликуваат од претходните шест избори одржани во последните три години, може да доведат до ново гласање, објави Радио Слободна Европа.

На последните избори одржани во јуни, немаше јасен победник, а седумте групи избрани во парламентот не беа во можност да формираат одржлива коалиција.