ДЕВАЛВАЦИЈА: Прашање на желба, време или пари?

Добивај вести на Viber

Нема услови и опасност од девалвација на денарот, сметаат дел од економистите, откако изминативе денови за оваа тема се погласно се зборува. Девалвацијата е лоша опција, затоа што ќе предизвика лоши ефекти, а пред се ќе го зголеми товарот за сервисирање на долговите што се во странски валути, смета економскиот истражувач  Бранимир Јованович, и додава дека според сегашните услови далеку сме од девалвација, а девизните резерви се на солидно ниво. Истиот став го дели и Марјан Николов, од Центарот за економски анализи, кој посочува дека во моментов нема ниту една причина за девалвација. „Девизните резерви се на задоволително ниво од околу 2,3 милијарди евра, а банките во Народна банка имаат ликвидност од околу 500 милиони евра. Во истовреме тековната и капиталната сметка се со вообичаените движења, а нема промени ниту во условите за тргување“ вели Николов, појсанувајќи дека тоа е показател дека нема никаква причина за девалвација на денарот. Аналитичарот Сами Беслими пак вели дека притисоци ќе постојат. „Доколку се реализираат заканите за прекинување на кредитирањето од Светска банка и ММФ, тоа ќе предизвика отежнување на условите за кредитирање и од комерцијалните кредитори, а сето тоа ќе предивика, прво перманентен глад од странска валута, потоа раст на каматните стапки, отежнување на другите услови за кредитирање, како и зголемување на трошоците на производство, а со тоа и намалување на ценовната конкурентност на домашното производство. Преценет курс на домашната валута, во услови на висока увозна зависност е неодржлива. Излезот е во намалувње на потрошувачката, посебно на јавната потрошувачка во рамките на можностите за нејзино финансирање (фискалниот капацитет). Инаку, не сум поборник за еднократна девалвација, но повеќе препорачувам пливачки курс со пошироки маргини. И во едниот и во другиот случај, доколку не се постигне политички концензус во земјата за кратко време, влегувањето во зона на рецесија е скоро неизбежна“вели Беслими. Шпекулациите за можна девалвација на денарот ги отфрли и гувернерот Димитар Богов, кој порача дека македонската економија останува стабилна, а стабилен е и денарот. Богов додаде дека Народната банка има капацитет и може да испорача ценовна стабилност , стабилен курс на денароот и стабилност на банкарскиот систем. „Македонија 19 години има стабилен курс на денарот. Во овие 19 години бевме соочени и со многу поголеми предизвици од овие сега, така што укажавме дека Народната Банка има капацитети и може да испорача ценовна стабилност, стабилност на курсот на денарот и сигурност на банкарскиот систем. Така што не треба да има загриженост околу ова, не треба да се верува на шпекулациите. Значи инфлацијата во Македонија останува многу ниска, курсот на денарот останува стабилен, банките остануваат најсигурно место за штедење, посочи пред неколку дена гувернерот Богов. С.Н.