Дeвизните резерви во злато се топат!

Добивај вести на Viber

Девизните резерви во мај се спуштија на ниво од 2 милијарди и 117 милиони евра. Ова салдо на вкупните девизни резерви е најниско во последните седум месеци или, пониско ниво од 2 милијарди и 103 милиони евра е измерено со крајот на септември, 2012 та година. Во споредба со состојбата од крајот на 2012 та година, вкупните девизни резерви во мај се намалени за 75,4 милиони евра. Најновите податоци на Народната Банка покажуваат дека во мај продолжува трендот на намалување на вредноста на златото. Резервите на злато заклучно со мај изнесуваат 237,9 милиони евра. Во однос на почетокот од годината, вредноста е намалена за 32 милиони евра. Еве како се движеше вредноста на златните резерви од почетокот на годинава : Јануари               270,0 милиони евра Февруари            265,2 милиони евра Март                    272,9 милиони евра Април                  245,2 милиони евра Мај                       237,9 милиони евра Кризата во Европа ги промени и плановите за чување на златото. Од почетокот на 2012 та година најголем дел од монетарното злато било депонирано во Банката на Англија. Но, во вториот квартал од лани паѓа нова одлука – за да се зголеми ефикасноста со управување на златните резерви и за да се остварат поголеми приходи, поради тогашниот раст на цената на златото, НБРМ одлучува дел од златото да инвестира како краткорочни депозити кај странски комерцијални банки. Рокот на чување, односно пласман изнесувал најмногу една година. Од почетокот на годината регистрирано е и намалување на девизните резерви во валути и депозити. Во мај вредноста изнесува 144,2 милиони евра и во однос на почетокот од годинава кај овој дел од државните резерви е забележано намалување за скоро 274 милиони евра. Неодамна “Фактор“ објави дека Народната Банка полека но сигурно се врти и кон инвестирање во други валути. За да ја намали изложеноста кон кредитен ризик, во оваа 2013 та година НБРМ планира 1,25% од девизните резерви да ги пренасочи во нови валути. “Се предвидува дека започнатиот процес на валутна диверзификација на девизните резерви во нови валути коишто ќе овозможат балансирање на изложеноста кон кредитен ризик од една страна и одржувањето на нивото на куповна моќ на девизните резерви на долг рок, од друга страна, ќе продолжи и во наредната година. За таа цел, за 2013 година е предвидено дополнителни 1,25% од девизните резерви да се пренасочат во финансиски инструменти деноминирани во нови валути, коишто се карактеризираат со повисоки стапки на поврат, но и висока ликвидност и сигурност на инвестициите“ – пишуваше во еден од последните  Извештаи за работата на Народната Банка. Со овој потег, според НБРМ, треба да се намали изложеноста кон кредитниот ризик. Со почетокот на 2012 та година, НБРМ инвестираше во нови четири валути : австралиски и канадски долар како и во норвешка и шведска круна. За разлика од бројките кои укажуваат на намалување на вредноста на златото и на резервите во валути и депозити, во мај е забележан тренд на пораст на вложувањата во хартии од вредност. Така, НБРМ, преку хартии од вредност чувала 1 милијарда и 733  милион евра, што во однос на јануари претставува раст од 159 милиони евра. А.Д.