ДИРЕКТОРОТ НА КОМУНАЛНА-РУСТЕМИ ДАЛ НЕОТПОВИКЛИВА ОСТАВКА: Тоа било морален чин, вели неговиот адвокат

Добивај вести на Viber

Директорот на Комунална хигиена Сабахудин Рустеми дал неотповиклива оставка од својата функција, вчера за време на распитот во Кривичниот суд, соопшти неговиот адвокат Асмир Алиспахиќ.

„Она што сакам да го изнесам јавно на барање на директорот е дека тој на записник пред судијата на претходна постапка ја депонира својата оставка. Станува збор за неотповиклива оставка од в.д. директор на јавното претпријатие Комунална хигиена. Тоа е еден морален чин од страна на сега веќе осомничениот, веќе поранешен директор Рустеми кој што не сака јавноста да мисли дека ќе ја попречува истрагата на кој било начин“ изјави синоќа адвокатот Алиспахиќ.

Неговиот адвокат појасни дека оставката на Рустеми е дадена откако тој се советувал со неговите бранители.

„Тоа е чин кој што ќе овозможи непречено водење на истрагата со цел да докажеме дека директорот нема никаква поврзаност со делото, а во насока дека ниту може да влијае, ниту влијаел, ниту ќе попречи какво било водење на истрагата“ појасни адвокатот.

Истакна дека станува збор за ретко кривично дело кое им се става на товар на двајцата обвинетти. Исто така рече дека директорот барал и од Управниот и од Надзониот одбор повеќе механизација и ресурси и врабтувања но истите не му биле одобрувани. 

Рустеми е именуван на функцијата во февруари 2025 година. 

Судот вчера на Рустеми и Аки Саити им одреди 30 дневен притвор.