Добивај вести на Viber
Паднаа каматите на кредити, но потонаа тие на депозити! Тоа е тајната на успехот! Токму ова го зголеми профитот на индустријата за 24,2 милиони евра. Големата четворка заедно стигна до профит од 51,2 милиони евра, а само „Стопанска банка Скопје„ има добивка над 31 милиони евра
Македонскиот банкарски сектор лани остварил профит од 75,4 милиони евра. Распределбата на добивка не е рамномерна меѓу 15 банки на домашниот пазар од кои 14 се целосно приватни и една , наменета за поддршка за извозот е целосно државна банка. Така големите четири банки имаат добивка од 59,7 милиони евра.
Другите 11 банки, средни и мали, имаат вкупно добивка од 15,7 милиони евра.
Кај „тешкашите“ неколку години наназад најдобитна е „Стопанска банка Скопје“ која лани имаше нето добивка од 31,12 милиони евра, а тоа е над 41 отсто од целата нето добивка остварена во 2015 година. Втора на листата е „НЛБ Тутунска банка“ со добивка од 13,58 милиони евра. На трето место во лигата на „тешкашите“ е „Комерцијална банка со добивка од 8,25 милиони евра. Четвртата по големина банка на домашниот пазар е „Охридска банка“, која е најмалиот член на големата четворка, и нејзината добивка лани е 6,7 милиони евра.
Според официјалните податоци на централната банка, достапни и во годишниот извештај на „НЛБ Тутунска банка“ за лани заклучно со 31.12.2015 година банкарскиот сектор оствари добивка од 4.64 милијарди денари (75,4 милиони евра). Добивката на банките пораснала за 24,2 милиони евра во однос на 2014 година кога профитот агрегатно изнесувал 3.15 милијарди денари (51,2 милиони евра). Подобрувањето на профитабилноста се должи на повеќекратни надолни корекции на каматните стапки кај депозитите во текот на годината што резултираше со пониски каматни расходи кај банките, како и поради пониски исправки на вредноста на финансиските средства, ова е објаснување во годишниот извештај за 2015 година дадено од стручните лица на една од најголемите три домашни банки.
Резултатот на банкарскиот сектор го објаснуваат вака: каматните приходи, во однос на претходната година (2014 н.з.) се повисоки за 262,3 милиони денари (4,3 милиони евра) или 1,3 отсто. Каматните расходи се пониски за 1,53 милијарди денари (24,9 милиони евра) или за 21,5 отсто. Кај групата големи банки состојбата е следна: заклучно со 31.12.2015 година групата големи банки оствари добивка од 3.67 милијарди денари (59,7 милиони евра) или за 18,9 милиони евра повеќе во однос на 2014 година кога беше остварена добивка од 2.51 милијарди денари (40,9 милиони евра). Порастот на профитабилноста во најголем дел се должи на повисоките остварени нето приходи од камати кои допринесоа за остварување на доволно нето приходи од работењето за остварување пораст на нето добивката. Лани учеството на големите банки се намали за 1 отсто до ниво од 67,1 отсто од целиот банкрски пазар во земјава.
Од достапните податоци на сајтот на Македонската берза може да се видат добивките за горенаведените четири банки и за ТТК Банка (добивка од 0,62 милиони евра), УНИ Банка (добивка од 1,32 милиони евра) , Стопанска банка Битола (добивка од 0,13 милиони евра) и за Централна кооперативна банка (загуба од 0,78 милиони евра). За останатите банки: Прокредит, Алфа банка, Еуростандард банка, Халк банка, Капитал банка и за Шпаркасе се уште нема официјални достапни податоци за добивката во 2015 година затоа што на нивните интернет страници не се објавени извештаите за 2015 година.
Р.Ф.