Добивај вести на Viber
Пругата кон Бугарија, три експресни патишта и еден автопат - ова се инфраструктурните проекти кои ќе се градат со заем од вкупно 305 милиони евра од Европската банка за обнова и развој (ЕБОР).
Договорот беше потпишан денеска и со него се предвидуваат крупни инфраструктурни проекти. Речиси половина од парите ќе бидат потрошени во втората делница на пругата кон Бугарија.
„Со завршување на оваа пруга на Македонија ќе и се отвори железнички пристап до пристаништата на Црното Море, со што ќе се обезбеди нова рута за македонските производи и ќе се зголеми трговската размена меѓу Македонија, Турција и Косово“, вели Сју Барет, директорка на ЕБОР за транспорт.
Заемот е со камата од 1,16% ќе се враќа во наредните 15 години со четиригодишен грејс-период. Останатите 160 милиони евра се наменети за три експресни патишта: Градско – Прилеп, Штип – Кочани и Охрид – Пештани, но и за автопат од Струга до Требеништа.
„Тоа ќе значи ангажман на домашни фирми и работници, подигнување на БДП за време на реализацијата на овие проекти, а долгорочно ќе се подобри конкурентноста на економијата, бидејќи ќе се отворат нови патни правци, а Македонија ќе има подобра патна инфраструктура“, вели вицепремиерот и министер за финансии Зоран Ставрески.