Драги Ѓоргиев: Синтагмата „Заедничка историја“ значи историја на еден народ од 9 век до 1944

Добивај вести на Viber

Копретседателот на заедничката комисија за историски и образовни прашања Драги Ѓоргиев во денешното интервју за РСЕ вели дека синтагмата „заедничка историја“ на бугарската историографија подразбира заедничка историја на на еден народ од 9 век до 1944.

Тој термин, како пшто вели професорот, е употребен во Договорот во членот што зборува за историската комисија и не е дефинирано што се подразбира под таа синтагма заедничка историја, по што дошло до судир со колегите од Бугарија во однос на тоа.

- Тие подразбираат дека станува збор за историја на еден народ, односно на бугарскиот народ која започнала кон средината на деветтиот век кога првото бугарско средновековно царство ја освојува територијата на Македонија. Според нив, тогаш се случува трајна етничка хомогенизација меѓу прабугарското население кое е дојдено од исток и словенското население кое живее на овие простори, се создава бугарскиот народ и оттогаш до 1944 година, тоа е историја само на еден народ, односно на бугарскиот народ, објаснува Ѓоргиев.

Толкувањето на копретседавачот на едно од прашањата е дека бугарската страна подразбира создавање на македонскиот народ со инженеринг од страна на комунистичката власт.

- Значи македонскиот народ, според ставовите на најголем дел од бугарската историографија, е создаден со, како што велат, инженеринг на Комунистичката партија на Македонија и на Југославија, на Коминтерната и на Тито. Ние веднаш апсолутно го одбивме таквото дефинирање на синтагмата заедничка историја и дури инсистиравме со колегите да посветиме посебно внимание на тој термин, да го дефинираме што значи заедничка историја, меѓутоа од бугарските колеги тоа беше одбиено и сега синтагмата заедничка историја останува како една од пречките во нашето дефинирање на некои препораки, и во учебниците и за заедничко чествување, вели тој.