Државата во вторник ќе се задолжи 488 илјади евра, исто толку ќе врати за 10 дена!
Објавено во: Финансии 11 Декември, 2015
Министерството за финансии ја најави новата аукција која е закажана за во вторник наредната недела. Државата планира да позајми скоро 488 илјади евра од домашните кредитори. Според проспектите објавени на веб страната на министерството за финансии, се работи за две аукции на државни хартии од вредност (ДХВ) во износ од по 244 илјади евра. Едната е со рок на доспевање од десет години, а другата со рок од една година. Исто толку, односно 488 илјади евра доспеваат за враќање на 22-ри овој месец.
Партиски извори од СДСМ за Фактор, коментираат дека овој пат и да имале право на вето, немало да го сторат тоа, бидејќи задолжувањето е во износ на доспеанитe долгови за враќање.
Инаку за претходната аукција СДСМ преку дополнителниот заменик-министер за финансии Наумов, се обиде да стави вето на аукцијата, но Државната изборна комисија го отфрли барањето за вето за аукциите на домашен пазар. Ваквата одлука важи и за сите наредни аукции на домашен пазар. СДСМ најави тужба за релевантноста на одлуката на ДИК, бидејќи за ветото гласаше состав кој е во заминување. Од СДСМ тогаш изјавија дека не се против задолжувањата кај домашните банки, ако се тие во износ колку што доспеваат ДХВ за враќање. Но посочија дека пред секоја аукција СДСМ ќе ги опоменува домашните банки дека доколку за аукцијата нема потпис и од дополнителниот-заменик таа ќе биде предмет на оспорување.
Освен аукцијата закажана за следниот вторник, до крајот на годинава според календарот е планирана уште една аукција на државни хартии од вредност. Минатата недела министерството за финансии по основ на поврат на ДДВ на стопанството врати околу 10 милиони евра, а по основ на доспеани хартии од вредност исплати 57 милиони евра.
Р.Ф