Дури 301 наставник во Битола е со договор на дело, можно е да нема оценки за учениците
Објавено во: Македонија 05 Декември, 2023
Градоначалникот на Битола, Тони Коњановски, упати барање до Министерството за образование што поскоро да склучи нови договори со 301 наставник, бидејќи на општината и се одземени ингеренциите за кадровската политика.
„Имајќи во предвид дека договорите на вработените лица до три месеци за итни и неодложни работи им завршуваат во месец декември, а месец декември е последниот месец од првото полугодие кога се формираат полугодишните оценки и успехот на учениците, наставниците на кои им истекуваат тримесечните договори за работа согласно законот за образование заради не добивање на согласности за распишување на огласи нема да можат да ги формираат конечните полугодишни оценки и полугодишниот успех на учениците.
Бидејќи Општина Битола ги достави Барањата до МОН – Скопје, а согласностите за распишување на огласи се уште ги немаме добиено, Ве молиме да ги добиеме бараните согласности како не би настанале несакани проблеми во воспитно образовниот процес од кои последиците ќе ги трпат учениците“, рече денеска Коњановски.
Во Општина Битола во основните училишта бројката на наставници за кои е побарана согласност за распишување на оглас е 213 наставници, а во средните училишта бројката е 88 наставници или вкупно за 301 наставник се побарани согласности од Министерството за образование и наука.
„Градењето на вредностите кај младите луѓе започнува од образованието. Не смееме да дозволиме политички удари и лични интереси, да остават длабоки последици врз нашите најмлади. Очекувам совесно работење од МОН, со цел учениците успешно да ја завршат учебната година“, додаде градоначалникот.