ЕК: Во Македонија расте инфлацијата, а буџетскиот дефицит, во првите месеци, пораснал на над 70% од планираното

Добивај вести на Viber

Во земјите од Западен Балкан дојде до извесно закрепнување на економски раст, иако тоа сее уште не е одразено на и понатаму големата стапка на невработеност, ниту на подобрувањето на животниот стандард и зголемување на потрошувачката во земјите од тој регион, се истакнува во економската анализа на Европската комисија (ЕК) за првите шест месеци од оваа година, пренесува Дојче Веле. Во анализата, која ја имала на увид српската агенција Бета, се нагласува дека до заживување во економијата и растот на Брутодомашниот производ (БДП) во земјите од Западен Балкан дошло затоа што минатата година четири земји од тој регион западнале во рецесија. Заздравувањето и економскиот раст би требале да продолжат, но и натаму да бидат „кревки". „Разликите во растот на БДП не се занемарливи и се движат од 2,1 проценти во Србија, па се до 4,3 проценти во Црна Гора. Невработеноста во Босна и Херцеговина достигна стапка од 44,5 проценти годинава, а само донекаде е намалена во Албанија, исто како и во Македонија, каде се уште е 29,9 проценти и во Србија, каде е 24,1 процент" - се наведува во анализата на ЕК. Инфлацијата е во пад во БиХ, Црна Гора, Косово, како и кај кандидатот за членство во ЕУ - Исланд, и тоа може да има извесен поволен ефект на реалните приходи на населението. Во Македонија и Турција, инфлацијата расте, „додека во Србија стагнира, но се уште е многу висока". „Освен во Турција, во сите земји од процесот на придружување кон ЕУ дојде до намалување на платниот дефицит поради слаба домашна побарувачка, што го ограничи растот на увоз, додека извозот е потикнат со постепениот пораст на странска побарувачка" - наведува ЕК. Се укажува на тоа дека „причините за поголеми буџетски дефицити отколку што е планирано во 2012 година, се поради паѓањето на буџетските приходи во Србија и во БиХ, а покрај тоа во Македонија и Албанија се значително зголемени издатоците, така што буџетскиот дефицит во Македонија бил повисок од планираниот во првите месеци годинава и брзо пораснал на над 70 проценти на целосната годишна цел".