ЕСМ купува електрична енергија од снабдувач за 6,7 милиони евра месецов, следниот ќе потроши 15-тина милиони евра

Добивај вести на Viber

АД ЕСМ месецов ќе плати 6.767.424 евра за електрична енергија што нема да ја произведе како државно електростопанство, туку ќе ја купи од надворешен снабдувач.

Струјата за потребите на домаќинствата и малите потрошувачи ќе биде купувана од словенечкиот снабдувач ГЕН-И во текот на целиот ноември по цена од 117,49 евра за мегаватчас за количество од 57.600 мегаватчасови. Договорот беше постигнат уште во јули по претходно распишан повик. 

Од ЕСМ потврдуваат дека електричната енергија веќе се користи за надополнување на производството што потоа го презема универзалниот снабдувач ЕВН и дека постигнатата цена, договорена во јули, се покажала како нешто пониска од актуелната на HUPX берзата при што ќе следува месечна заштеда од неколку стотини илјади евра. Средната цена на HUPX берзата деновиве е околу 123 евра по мегаватчас.

Во декември се очекува ЕСМ да плати многу повисока сума за увозна електрична енергија. За договор постигнат во јули, државните електрани на ГЕН-И ќе му платат 8.574.600 евра за струја по цена од 115,25 евра по мегаватчас, а во договор постигнат во октомври на ЕДС, Хсе Мак и ЕТМТ Енерџи заеднички ќе им се платат 6.289.776 евра. Тоа се вкупно 14.864.376 евра што ќе се потрошат за набавена електрична енергија во декември.

Во меѓувреме, Регулаторната комисија за енергетика е во завршни подготовки за формирање на новата цена на електричната енергија, која домаќинствата ќе ја плаќаат од први јануари. Регулаторна веќе ги доби пресметките за трошоците за пренос и дистрибуција на електричната енергија од МЕПСО, Електродистрибуција, „ЕВН Хоум“ и МЕМО. Одлуката за цената на новите тарифи треба да ја донесе најдоцна до 30 ноември и таа ќе биде на сила од следната година. Според информациите, не се очекува значителна корекција на цената на струјата од 1 јануари 2026 година.

Промената на цената на струјата, исто така,ќе зависи од цената по која ќе ја понуди ЕСМ струјата на тендерот на „ЕВН Хоум“, која во јули немаше промени и изнесуваше 62 евра за мегават-час. Поради тоа, цената на електричната енергија за домаќинствата и за малите потрошувачи остана непроменета.