Европските инвеститори се охрабрија од добрите вести од компаниите

Добивај вести на Viber

Цените на акциите на европските берзи денеска благо пораснаа, откако инвеститорите ги израдуваа добри вести од компаниите. Меѓутоа, нивниот раст беше ограничен со падот на цената на акциите на банките, откако Barclays најави издавање на правото за купување на акции во износ од 5,8 милијарди фунти. Лондонски FTSE околу 14.00 часот беше во плус 0,23 отсто, на 6.575 поени, франкфуртски DAX 0,28 отсто, на 8.282 поени, а париски CAC порасна за 0,43 отсто, на 3.986 поени. Цената на акцијата на Barclays падна за 7,2 отсто откако банката извести за полоши од очекуваните полугодишни деловни резултати и за поголемото од очекувано издавање на права за купување на акции, со дисконт од 44 отсто до актуелната цена. Загриженоста во врска со билансот ја погоди и акцијата на Deutsche Bank, чија цена падна за 4,1 отсто, откако вети дека ќе го намали ризичниот имот и извести за полоша од очекуваната тромесечна добивка. Нафтената компанија BP исто така не ја оствари очекуваната тромесечна заработувачка, што ја спушти цената на нејзината акција за 5,1 отсто. Позитивен тон на берзата дадоа француската комунална групација EDF, британската комерцијална телевизија ITV и инженерската компанија Weir Group, чија акција поскапе измеѓу 3,8 и 6,9 отсто.