ЕВРОСТАТ: Бугарија најсиромашна земја во унијата

Добивај вести на Viber

Албанија и Босна имаат најнизок БДП по глава на жител од 37 разгледани европски земји, додека Бугарија е најсиромашна земја на Европската унија, соопшти европската статистичка агенција Евростат.

Албанија има најнизок бруто домашен производ по глава на жител и најниска вистинска индивидуална потрошувачка меѓу 37 европски земји според извештајот на Евростат, пренесен од Балканската истражувачка мрежа (БИРН).

Извештајот опфаќа 28 земји членки на ЕУ, плус Швајцарија, Исланд, Норвешка, Албанија, Македонија, Србоја, Турција, Црна Гора и Босна.

Врз основа на прелиминарните резултати за 2013 објавен во вторникот албанскиот БДП е само 28 одсто од просекот на Европската унија.

Босна не е далеку од Албанија со БДП кој е 29 одсто од просекот на ЕУ, додека БДП на Македонија е 36 одсто, Србија 37 одсто, и Црна Гора 40 одсто од просечниот БДП на Европската унија.

Хрватска, најновата членка на Унија, најбогатата земја во областа на југоисточна Европа со БДП кој е 61 одсто од просекот на Унијата. Со тоа Хрватска е пред другите две членки на Унијата во таа област - Романија чиј БДП е 55 одсто од просекот на Унијата и Бугарија со БДП кој е 45 одсто од просекот.

Евростат наведува дека кога се земе предвид куповната моќ Луксембург има далеку највисок БДП меѓу земјите членки на ЕУ, кој е повеќе од два ипол пати поголем отколку просекот на ЕУ.