Фактор анализа: Зошто дивидендата од 900 денари за акција на Комерцијална банка е реална и очекувана?

Добивај вести на Viber

Трите клучни фактори од кои зависи износот на дивиденда одат целосно во прилог на тоа дека акционерите на Комерцијална банка годинава ќе добијат историски највисока награда за нивните вложувања во акциите на најголемата домашнопоседувана деловна банка

Инвеститорската јавност позитивно ја прими неофицијалната информација на „Фактор“ дека може да се очекуваат 900 денари бруто износ за секоја акција на „Комерцијална банка“.

Еве неколку факти кои говорат во прилог на тоа зошто информацијата за 900 денари е реална и очекувана барем за дел од инвеститорската заедница која тргува акции на Македонската берза за хартии од вредност.

Клучен аргумент што дава поткрепа на ова очекување е фактот утврден во корпоративната политика на таа банка. А таму е декларирано и е дадено на јавен увид на сите актуелни и потенцијални акционери дека банката може да исплати во форма на дивиденда до 70 отсто од добивка за годината за која се доделува дивидендата.

По овој деклариран факт, кој се прави за предвидливост на дивидендната политика, и е многу ценет и корисен за акционерите, произлегува дека дивидендата од 900 денари во бруто износ е реална и очекувана.

Според податокот од консолидираниот неревидиран биланс на успех за 2023 година што неодамна го објави таа банка основната заработка по акција изнесува 1.574 денари. Во корелација со декларираното од корпоративната политика излегува дека износот од 900 денари е понизок за 200 денари од максимално пропишаниот износ од 1.100 денари за акција.

Праксата за доделување дивиденда кај оваа акција покажува дека максималниот деклариран износ никогаш не бил исплаќан во форма на дивиденда. Доколку биде предложен износ од 900 денари за акција и одобрен од акионерите тоа ќе биде највисок износ на дивиденда што досега го доделила таа банка.

Друг надворешен клучен фактор од кој зависи дивидендата кај која било банка е Народната банка. Таа согласно системската позиција и законските надлежности има мандат да корегира износ на дивиденда кај која и да е банка. Ако за тоа има аргументи од својата супервизија врз работењето на банките. Но во овој случај износот од 900 денари е за речиси 20 отсто понизок од максимално декларираниот износ за исплата на дивиденда што може да ја подели Комерцијална банка. И во овој случај централната банка не би требало да биде ризик фактор за износот на дивиденда.

Трет најважен агрумент е односот и очекувањата на акционерите за дивидендата. Иако никогаш не е кажано официјално во јавноста веќе некое време поголемите акционери, вклучително и најголемиот поединечен, не кријат дека нивните очекувања за дивиденда се високи. И за нив тоа дополнително го подобрува угедот и имиџот на банката во инвеститорската јавност. Ова значи дека и од тој одучувачки фактор предлогот за дивиденда од 900 денари многу веројатно би бил не само прифатен туку и баран.