ФАКТОР НА ДЕНОТ: Се навршија две години од Договорот од Преспа, и денес рекорд на новозаразени од Ковид -19

Добивај вести на Viber

ПОМИНАА ДВЕ ГОДИНИ ОД ПОТПИШУВАЊЕТО НА ДОГОВОРОТ ОД ПРЕСПА

Зоран Заев, претседателот на СДСМ, од денешна перспектива, по повод две години од потпишувањето на Преспанскиот договор, смета дека изминатиот период покажал дека се исплателе сите напори и предизвици пред и по постигнувањето на оваа спогодба.

„Денес одминуваат точно две години откако го потпишавме Договорот од Преспа. Денес слободно можеме да кажеме – ВРЕДЕШЕ! Вредеше затоа што станавме полноправна членка на најсилниот воено-политички сојуз во светот – НАТО. Седиме на иста маса, рамо до рамо со најуспешните, најразвиените и најсилните. Македонската иднина е обезбедена, а границите засекогаш сигурни.

Вредеше затоа што Преспанскиот договор нѐ донесе чекор поблизу до Европската Унија и конечно ги отворивме вратите на нашата ЕУ интеграција. По 15 години чекање почнуваме преговори за членство. НАТО и ЕУ се наша силна поддршка за развој, но и за соочување со предизвиците и опасностите како што е коронавирусот. Изминатиот период добивме голема помош и поддршка од нив“, вели Заев на својот профил на Фејсбук.

Докажавме дека во балканската историја не се потребни победници и губитници, пишува на Фејсбук екс грчкиот премиер, Алексис Ципрас на две години од Договорот од Преспа. 

„Грција се најде на вистинската страна на историјата. Дури и оние кои се бореа против Договорот го докажуваат тоа во пракса, оние кои зборуваа за „предавство′′ и „национално повлекување". Оние кои одеа рамо до рамо со националистите,
тие се истите кои денес говорат со најубави зборови за односите на земјата со Северна Македонија и улогата на земјата во ревитализација на европската перспектива на Западен Балкан, во најтешко време“, пишува Ципрас. 

НОВ РЕКОРД НА ЗАРАЗЕНИ ОД КОРОНАВИРУСОТ

Во последните 24 часа забележан е нов рекорд во Македонија на нови позитивни случаи на Ковид-10 со 193 заболени од 1391 тестирање, од кои 140 само во Скопје, а евидентирани се и девет починати. По Скопје, следуваат 19 позитивни во Тетово, во Охрид 11, а во Штип 6. Се зголемува и бројот на оздравени и тој е 46 во меѓувреме.

На Клиниката за инфективни болести и фебрилни состојби починаа три лица од Скопје на возраст од 78 и 47 години хоспитализирани на 4 односно 7 јуни и пациентка на 85 години, хоспитализирана на 9 јуни.

Во ГОБ „8 септември“ починаа четири лица, двајца пациенти од Скопје на возраст од 69 и 67 години, хоспитализирани на 9 односно 15 јуни, пациентка од Куманово на 67 години, примена на 2 јуни и пациент од Тетово на 61 година, примен на 2 јуни.

За дексаметазонот, директорката на Клиника за инфективни болести и фебрилни состојби д-р Милена Стевановиќ вели дека го користела и дека имал позитивни ефекти. 

Таа рече дека се следат препораките од целиот свет во однос на лекувањето. 

Вели дека она што беше напишано и се појави во медиумите, е сумирано од искуство на голем број пациенти.