Фактор24: Ловот на физички лица како ДДВ обврзници е крајно проблематичен

Добивај вести на Viber

Правните и даночните експерти се навистина изненадени од одлуката да се оданочуваат физичките лица чии годишен приход ќе надмине еден милион денари со ДДВ и тоа за дел од нив одредбите да важат ретроактивно со пишување на казни што е целосно врз нивна штета. 

Во најновото издание на Фактор24 анализиравме зошто ваквиот начин на „лов“ на физички лица со наметнување на обврска за ДДВ е неправичен.

„Граѓаните досега покажаа голема одговорност и самите дури ги пополнуваа годишните даночни пријави. Ова е нешто ново, се руши еден систем на ДДВ кој е граден 16 години, и се чини како некој да требало да биде казнет“, вели редовната професорка по даночно право Александра Максимовска од правниот факултет „Јустинијан Први“.

Според правилник кој го има само УЈП регистрацијата на физички лица како ДДВ обврзници се внесува правна несигурност, прагот трет пат е сменет и сега е најнизок, а може да влијае директно на зголемување на даночната евазија.

„Рокот за регистрација како ДДВ обврзник истече на 15 јануари и не сите знаеја дека имаат ваква обврска. И во минатото имало физички лица кои надминале 1 милион денари годишно во приходите па не плаќале ДДВ. Исто така проблем е што се заведуваат лицата кои даваат деловен имот под закуп, а се претпоставува дека оваа обврска ќе ја имаат и лицата со приходи од авторски права. Кај нив нема речиси никаков основ за поврат на ДДВ, бидејќи нема влезни фактури“, вели претседателот на здружението на даночни советници Павле Гацов.

Освен двојното оданочување, немањето основ за поврат на ДДВ и правната несигурност, оваа постапка е во спротивност и со европските директиви.

„Намалувањето на прагот на 1 милион денари e да се подведат во системот на ДДВ помалите фирми, трговци и занаетчии, но сите тие реализираат одредена стопанска дејност. Кај авторските правa и закупнините УЈП врши двојно оданочување и е во судир со шестата директива на Европската комисија, што е навистина за жал бидејќи Македонија со досегашната примена на ДДВ и воопшто со едноставноста на даночниот систем беше пример во Европа“ додава професорката Максимовска.

Гледајте Фактор24 политичко-економски магазин кој го подготвува тимот на faktor.mk на ТВ 24 секоја среда од 22:30 часот.