Фатмир Битиќи: По 17 години се враќаме на циклусот на редовни парламентарни избори
Објавено во: Македонија 05 Декември, 2023
Добрата вест за граѓаните, според вицепремиерот за економски прашања Фатмир Битиќи, е враќањето во циклусот на редовни парламентарни избори по 17 години. Како што вели Битиќи во „Клан Дебата“, граѓаните биле навикнати да имаат избори на секои две-три години, а тоа, според него, била и целта на македонската опозиција.
„Граѓаните, но и политичките актери, треба да се научат дека изборите треба да се одржуваат на секои 4 години, за тие што ќе дојдат на власт да имаат доволно време да ги спроведат програмите и политиките што ги предвиделе“, рече меѓу другото Битиќи.
Тој изјави дека мора да се почитува законот кој произлезе како резултат на договорот од Пержино, според кој во последните 100 дена пред парламентарните избори мора да има техничка влада во која опозицијата зема активно учество.
Битиќи нагласи дека на партиската средба на СДСМ разговарале и не го напуштиле договорот пред четири години со ДУИ, според кој премиерот во последните 100 дена ќе се одбере од партијата предводена од Али Ахмети. Според него, во СДСМ немало забелешки на оваа идеја и покрај тоа што договорот го направил поранешниот прв човек на партијата Зоран Заев.
„Ние сме партија која многу тесно се придржува до секој пишан договор и даден збор“, рече тој меѓу другото.