Финансискиот сектор во Македонија останува стабилен

Добивај вести на Viber

Стабилен е финансискиот сектор во Македонија  иако има голема несигурност во светската економија, изјави денеска вицепремиерот Зоран Ставрески. На денешната редовна средба меѓу претставниците на финансиските супервизорски органи тој посочи дека нема системски ризици по овој сектор.

„ Банките и останатите сегменти на финансискиот пазар успеваат да се справат со актуелните предизвици што ги носат европската и светската криза. Се разбира во одделни сегменти имаме движења кои треба да се нотираат и за кои денеска ќе дисутираме. Конкретно во сегментот на финансиски друштва досега се формирани три од кои едно е за издавање и администрирање картички и две се претежно во делот кредитна активност, факторинг и гаранции“, изјави Ставрески и додаде дека од последната средба промена има и на пазарот на капитал со задолжителната котација. „Ќе имаме дополнителни 90 компании кои ќе котираат на Берзата и тоа ќе овозможи колку што е возможно во вакви околности да се зголеми ликвидноста на Берзата и да има повеќе тргување“, додаде вицепремиерот.

Гувернерот на Народната банка на Република Македонија, Димирар Богов рече дека новина е тоа што по измените на законот за банки од пред неколку месеци веќе има три барања од три штедилници за трансформација во финансиски друштва.

„Барањата во НБРМ веќе се процесуирани и веќе постапката продолжува во Министерството за финансии каде ќе бидат разгледани во наредниот период“, рече Богов. И вицепремиерот и гувернерот посочија дека и покрај стабилноста во финансискиот сектор потребна е координација меѓу Народната банка и Министерството за финансии со следење на актуелните состојби, нови идеи за промена на регулативата и останати работи.