ФИНЕКСПО: Банките да го „одврзат ќесето“ за малите и средни претпријатија

Добивај вести на Viber

Малите и средни претпријатија и особено старт-ап фирмите потешко доаѓаат до кредити отколку големите компании, беше констатирано на расправата на Конференцијата за финансии, деловни можности и економски развој - ФИНЕКСПО 2014. „Фирмите со добар историјат немаат проблем со добивањето кредити. Каматите се прифатливи, но проблем е тоа што ниту една банка не нуди продукт кој би дал имплус на старт-ап бизнисите“, нагласува Даниела Арсовска од Сојузот на стопански комори. Дека пристапот до капитал за малите и средни компании се уште е отежнат признава и гувернерот Димитар Богов. Тој побара од банките да помогнат во изготвувањето бизнис плановите за одобрување кредити во делот каде што бизнисот греши. Банкарите се птимисти дека во 2015-та кредитирањето ќе бележи уште поголем раст од годинешниот, а во прилог на тоа се и позитивните сигнали од еврозоната како стабилноста на најголемите банки, докапитализирањето на дел од нив, ниските камати и се почестото вложување во обврзници на подолг рок. Следната година со законски измени дополнително ќе се стимулира кредитирањето и осигурувањето, најави вицепремиерот и министер за финансии Зоран Ставрески. Кредитите годинава бележат раст од 9,3%, додека нефункционалните или ризични пласмани изнесуваат 12%. Сепак и со ова ниво, банкарскиот систем во Македонија се оценува како стабилен, заклучија учесниците на ФИНЕКСПО.