Германската Комерцбанка „крчка“ откази за скоро 4.000 вработени - дали се ова чекори за спас од преземање?

Добивај вести на Viber

Се очекува германската Комерцбанка во септември да постигне договор со претставниците на вработените за планираното отпуштање на 3.900 вработени со полно работно време, објавува деловниот весник „Ханделсблат“.

Во исто време, италијанската Уникредит банка ја зајакнува својата позиција како најголем акционер. Оваа банка вели дека го зголемила својот удел во Комерцбанка на околу 26 проценти, но дека во моментов не сака место во одборот на директори, објавува агенцијата Анса.

Италијанската банка, исто така, објави дека ќе ги конвертира преостанатите финансиски инструменти во акции на Комерцбанка „во догледно време“, што би го зголемило нејзиниот вкупен удел на приближно 29 проценти.

Уникредит со тоа ја зајакнува својата позиција како најголем акционер на Комерцбанка, без да влезе во управувањето, објави Анса.

Германската влада сè уште држи околу 12 проценти од акциите на Комерцбанка и неодамна ја отфрли можноста за понатамошна продажба на акциите. Доколку се надмине прагот од 30 проценти, „Уникредит“, според законот, би бил обврзан да даде официјална понуда за купување на преостанатите акционери на таа германска банка со седиште во Франкфурт, чии акции се вклучени во индексот DAX на Франкфуртската берза.

Затворање филијали

Во Германија постои голема загриженост дека нивното спојување ќе доведе до намалување на бројот на работни места и затворање на филијали, потсетува агенцијата DPA. И „Комерцбанка“ и германската влада остро се спротивставија на преземањето. Управниот одбор и работничкиот совет на „Комерцбанка“ постојано ги оценуваа постапките на италијанската банка како „непријателски“.

Германскиот канцелар Фридрих Мерц повторно потврди во писмо до Саша Ибел, претседател на работничкиот совет на компанијата, дека владата се залага за „силна и независна „Комерцбанка“.

Оваа банка сега планира да ја зачува својата независност со елиминирање на илјадници работни места и зголемување на профитот, пишува DPA.

Извршната директорка на „Комерцбанка“, Бетина Орлоп, спроведува стратегија за зачувување на независноста на банката и ја усовршува својата одбрана од понудата, забележува Ројтерс.

Извршната директорка на „Уникредит“, Андреа Орцел, се залага за придобивките од прекуграничното спојување, кое треба да се случи на есен, и покрај противењето во Германија.

„Уникредит“, која веќе има упориште на германскиот пазар преку „Хиповерајнсбанк“ (ХВБ), гледа можност во работењето со приватни и средни корпоративни клиенти.

„Комерцбанка“ одби да коментира за извештајот на „Ханделсблат“.

Фото: Принтскрин/Икс