Goldman: Купувајте злато ако цената падне под 1.250 долари
Објавено во: Финансии 07 Октомври, 2016
Цената на златото падна за речиси 5% оваа недела, но Goldman Sachs става граница под која им препорачува на инвеститорите повторно да почнат да влегуваат на пазарот. Нивото кое Goldman го става како клучно е 1.250 долари за унца. До 13:15 часот по македонско време, фјучерсите на златото за испорака во декември се тргува на ниво од 1.250 долари за унца.
Реакцијата на цената на златото во однос на можноста ФЕД да ги крене каматите во САД кон крајот на годината беше „поголема од предвидената“, рекоа аналитичарите од Goldman, Макс Лејтон, Михаил Спрогис и Џефри Кјури. На овој начин остануваат ризиците до крајот на годината да не биде постигнато нивото од 1.280 долари за унца, како што прогнозираат од Goldman.
Иако од Goldman предвидуваат дека ФЕД ќе ја зголеми каматата во САД до крајот на годината (што традиционално се одразува негативно на цената на златото), аналитичарите од инвестициската банка велат дека има фактори кои ќе ја поддржат цената на златото. Меѓу нив се најсилните купувања на берзанските фондови, кои го следат златото и силната побарувачката на златни прачки. Кон ова треба да се додаде и потенцијалот за раст во инвестициската побарувачка за злато од Кина, велат од Goldman.
- Ако дојде до распродажби на злато, кои ќе го доведат нивото значително под 1.250 долари за унца, гледаме на ова како на стратешка можност за откупување, имајќи предвид дека значителните ризици пред растот на светската економија остануваат, велат од Goldman.