„ГРАНИТ“ ГИ ПОТВРДИ ИНФОРМАЦИИТЕ НА ФАКТОР - белградската компанија „Бард коп“ е новиот акционер со над 5 отсто од капиталот

Добивај вести на Viber

Градежната компанија „Гранит“ ги потврди информациите кои уште утрово ги објави Фактор, а тоа е дека во компанијата има нов акционер кој поседува над 5 отсто од капиталот, кој доаѓа на местото на Сава пензиски фонд, кои одлучија да го продадат својот пакет од 7,5 отсто од акциите. 

„Согласно член 38, точка 1 од Правилата за котација известуваме дека друштвото BARD-KOP DOO BEOGRAD-NOVI BEOGRAD се има стекнато со 155,346 обични акции од издавачот на хартии од вредност ГД Гранит АД Скопје, кои претставуват 5,61 отсто од вкупните акции со право на глас“, се вели во известувањето кое „Гранит“ го испрати до инвеститорската јавност преку Берзата.

Како што веќе објавивме, законски е дозволено единствено објавување на сопствениците на капитал над 5 отсто во трговските друштва, а со последната промена од понеделникот, евидентирано е дека Бард - Коп Доо е сопственик на 5,06 отсто од акциите. Останатите сопственици со удели од над 5 проценти се уште самото градежно друштво со 9,81 отсто, потоа Зоран Милковски со 8,90 и Ивана Милковска - Симева со 8,84 проценти. Уделот на странските правни лица во „Гранит “ е 6,56 отсто и нив ги има вкупно осум. Вкупниот број на акционери е 4.028 физички и правни лица - домашни и странски.