Грција го усвои буџетот за 2014

Добивај вести на Viber

Грчките пратеници синоќа го прифатија буџетот за 2014 година со кој се планира да се оствари заштеда поголема од три милијарди евра и според кој земјата оптоварена со долгови следната година би требало да излезе од шестгодишната рецесија. Грција во 2014 година очекува раст на бруто домашниот производ (БДП) од 0,6 отсто, надевајќи се дека ќе осигури повеќе простор за маневрирање за враќање на своите големи долгови. На гласањето од 300 пратеници, предлог буџетот го поддржаа 153 пратеници од двете владејачки партии, конзервативната Неа демократија и социјалистите од Пасок. Против грчкиот буџет за 2014 година беа 142 пратеници и еден воздржани, а во гласањето не учествуваа и тројцата пратеници на неофашистичката Златна зора кои се во затвор по акцијата на властите по оваа партија по низата инциденти поврзани со нејзиното дејствување. Пратениците од левата коалиција Димар којашто во јуни годинава ја напушти владејачката коалиција, гласаше против буџетот барајќи измени на односите меѓу Грција и Европската унија и странските кредитори. Владата во Атина предвидува дека во оваа година ќе оствари буџетски вишок од 812 милиони евра, благодарение на приходите од даноците повисоките од очекуваните.