Грција се подготвува да се врати на финансиските пазари пред втората половина на 2014 година

Добивај вести на Viber

Грција , која е лишена од пристап до финансиските пазари од избувнувањето на должничката криза пред три години , се подготвува да се врати на овие пазари во втората половина на 2014 година , изјави денеска грчкиот заменик- министер за финансии Христос Стаикурас , пренесе агенцијата " Франс прес " . - Свесен за оптимистичките макроекономски индикатори , ние спроведуваме финансиски техники кои ќе и овозможат враќање на Грција на меѓународните пазари и кон среднорочни кредити во втората половина на 2014 година , потврди Стаикурас по повод дискусиите во грчкиот парламент за нацрт-буџетот за 2014 година Откако Грција прибегна кон спасувачкиот план од ЕУ и ММФ во 2010 година , земјата може да зема само краткорочни заеми. Грчката влада предвидува за следната година примарен буџетски суфицит од 1,6 отсто или околу 3 милијарди евра и благ пораст на бруто домашниот производ од 0,6 проценти по шест последователни години на рецесија. Стаикурас потсети дека во 2013 година Грција се очекува да реализира за првпат по децении примарен буџетски суфицит во износ од 812 милиони евра. Нацрт-буџетот беше изработен во клима на постепено враќање кон финансиска и макроекономска стабилност , се пофали тој. Дебатите за предлог-буџетот за 2014 година , кои почнаа во вторникот вечерта , треба да завршат со гласање во текот на ноќта во саботата кон неделата .