Груевски: Државата е нападната, само народот може да ја одбрани

Добивај вести на Viber

Лидерот на ВМРО-ДПМНЕ, Никола Груевски на својот Фејсбук профил пишува дека ако народот не биде доволно активен и доволно упорен, Република Македонија нема да е Република Македонија и на неколку пати во неколку фази ќе заврши операцијата. 

Но, според него, ако народот биде активен и упорен и ако не потпадне и не се пасивизира под суптилната медиумска пропаганда, нема никаква можност за успех на операцијата. Таа ќе пропадне и ќе биде поразена, смета Груевски.

„Кога државата е нападната, само народот може да ја одбрани. Не можат само политичарите, особено кога еден дел од нив се борат за заштитат, а друг дел се на спротивната страна. Оваа шанса народот ја имаше на изборите. Во кампањата говорев секој ден за тоа. Погледнете ги моите обраќања во Штип, Велес, Скопје. Дел добро ме разбраа. Некои не веруваа, мислеа дека со тоа само сакаме да добиеме гласови, а СДСМ да ги загуби. Денес се’ помалку има такви, но главниот воз е пропуштен. Сега е последниот воз. Сега е тоа време“ - пишува Груевски. 

Основната причина за целата операција за рушење на власта и носење на Зоран Заев е слабеење на државата со цел промена на името и идентитетот на Македонците, наведува тој. Според Груевски, тоа е главната и основна причина заради која е започната операцијата за рушење на ВМРО од некои надворешни центри. Овој процес може да донесе и до губење на државата.

„Ако народот остане рамнодушен, ќе ја превземат државата, комплетно ќе ја редефинираат и ќе управуваат со тој народ“ - додава Груевски. 

Вели дека ова е операција која во голема мера е поддржана од СОРОС.