Груевски ги прифати критиките на „Стандард и Пурс“, нема веќе непродуктивни расходи?

Добивај вести на Viber

По силната владина реакција и неприфаќање на изваштајот на „Стандард и Пурс“ со кој беше намален кредитниот рејтинг на државата, денеска стигнуваат смирувачки тонови. Според премиерот Никола Груевски, дел од препораките на Агенцијата ќе бидат прифататени, а понатаму владата ќе се труди да прави продуктивни расходи. Тој посочи дека секоја држава има ситуации кога треба да инвестира во работи врзани со државноста, но во иднина рече тој, максимално ќе се трудиме да имаме колку што е можно повеќе продуктивни инвестиции. За време на денешната средба бизнисмените од Стопанската комора, тој ги искара дека се пасивни и незаинтересирани за освојување нови пазари и ширење кон Азија, Африка и Америка затоа што Европа, додаде тој, уште е криза. На Груевски пак за време на традиционалниот појадок со бизнисмените му беа испорачани 77 предлог мерки за економски раст. Од Сојузот на стопански комори му порачаа дека без кредитен раст, нема ниту економски раст. „Ние имаме проектиран раст на БДП од 2 отсто, имаме 3 отсто инфлација проектирани за 2013 година и имаме кредитен раст од 5 отсто. Без кредитен раст меѓу 8 и 10 отсто на номинален раст на БДП од 5 отсто, ние не можеме да постигнеме значителен раст годинава“, истакна претседателот на ССК, Златко Калеников. Од Владата најавија дека ќе ги разгледаат барањата на бизнисмените во најбрз рок и ќе ги прифатат сите оние кои се остварливи.