Груевски го нема и на Комисија за уставни измени
Објавено во: Македонија 10 Ноември, 2018
Екс премиерот, Никола Груевски денеска не дојде на Комисија во Собранието.
Тој не се појави на Комисијата за уставни измени, каде денеска се раправа за третиот нацрт-амандман во втората фаза од процесот за уставните измени, објави Макфакс. Груевски претходно побара одложување на затворската казна.
Груевски утрово не се појави ниту во затворот Шутка, каде треба да ја отслужува затворската казна во времетраење од две години за предметот „Тенк“ поврзан со набавката на луксузниот мерцедес од 600 илјади евра.
Кривичниот совет вчера ја потврди одлуката на судијата за извршување на затворската казна.
Инаку, вчера помина и вториот нацрт амандман за уставни измени во собраниската Комисија за уставни прашања.
Имаше девет гласа „за“ и седум „против“. Со вториот нацрт амандман за измена на Уставот во Преамбулата на највисокиот правен акт одлуките на АСНОМ се заменуваат со Прогласот од АСНОМ и се додава Охридскиот рамковен договор.