Груевски: Новите проекции на НБРМ се резултат на добрите економски придвижувања

Добивај вести на Viber

Најновите предвидувања на Народна Банка на Македонија за повисокиот раст на БДП се резултат на добрите придвижувања во економијата годинава смета премиерот Никола Груевски.  Според него, позитивните раздвижувања, ја изненадија и Централната банка, ММФ и други меѓународни институции. Сега, вели тој, сите вршат одредени поместувања на проекциите кон повисоко зашто досегашните предвидувања се реализираа повеќе од очекуваното. „Во првите два квартала растот е околу 3,3 отсто што укажува дека трендот е подобар, економијата доживеа побрзо раздвижување и анимирање. Иако ризици се уште постојат поради актуелната европска должничка криза, перспективите за Македонија се подобри и од тој аспект Централната банка ја изврши корекцијата“, истакна Груевски. Според премиерот, промените во прогнозите, се и резултат на владините реформи за подобрување на економијата. Владата ќе продолжи да работи колку што е можно повеќе со цел работите да се придвижат побрзо, истакна Груевски. Според последните проекции на НБРМ како што веќе објави Фактор, ќе има раст на бруто-домашниот производ за 3,3 отсто годнава, односно за 3,7 проценти во 2014 година. Оттаму прогнозираат дека растот на македонската економија во 2015 ќе достигне до 4,4 проценти, а како главни носители за ова ќе бидат извозниот сектор, инвестициите, но и очекуваното зголемено кредитирање.