Груевски се појави на плакат како „Орбановиот ВИП-мигрант“
Објавено во: Македонија 19 Ноември, 2018
Екс премиерот, Никола Груевски се појави на плакат како „Орбановиот ВИП-мигрант“ и виси на унгарскиот парламент.
Пратениците од унгарската опозициска Демократска коалиција поставија плакат со ликот на избеганиот Груевски на еден од прозорците на својот парламент, со зборовите „Орбановиот ВИП-мигрант“, јавуваат унгарски медиуми.
„Неделава го напаѓаме Фидес со нашето оружје. Претставниците на Демократска коалиција во парламентот ќе зборуваат за еден случај на илегална миграција во Унгарија, случајот со македонскиот премиер“, соопштија од ДК.
Опозициските партии денеска во парламентот побараа формирање анкетна комисија за случајот со Никола Груевски за да се утврди евентуалната вмешаност на унгарските власти во бегството на осудениот поранешен премиер, а минатата недела ја повикаа унгарската Влада да го уапси и брзо да го екстрадира Груевски.
Унгарската националистичка партија Јобик, како и левичарските партии како Дијалог и Демократска коалиција, порачаа дека на Груевски треба да му биде одбиен азилот и дека тој треба да биде екстрадиран во Македонија.
Пратеникот и портпарол на Јобик, Адам Миркоцки, тогаш ја нарече ситуацијата „скандал без преседан“. Кажа дека Груевски е „баран криминалец“ од земја што не е во војна и дека не е прогонуван од верски или од политички причини.