Хојт Ји: Да се формира нова влада, Македонија има многу работа

Добивај вести на Viber

Сите страни во Македонија да бидат подготвени на компромис и да се формира нова постизборна влада, порача денеска од Загреб заменик помошникот државен секретар на САД за европски и евроазиски прашања Хојт Брајан Ји, пренесоа медиумите од регионот. 

Вели дека САД се заинтересирани за стабилноста и просперитетот на државите во регионот. 

„Искрено се надеваме дека македонскиот претседател ќе им овозможи на пратениците кои изразија желба за тоа и на партиите што тие ги претставуваат да формира влада што е можно поскоро, бидејќи на Македонија и треба влада која ќе ги продолжи и ќе ги доврши почнатите процеси во рамки на претпристапниот процес на Европската Унија. Македонија има многу работа. Но, прво мора да формира влада. ЕУ и САД тесно да соработуваат со цел тоа да се случи“ - изјави Ји.

Тој рече дека во земјава има остра реторика. 

„Тоа е природно и нормално дека политичките тензии ќе бидат многу високи, реториката е многу силна, можеби не е прифатлива или ние веруваме дека луѓето во Македонија сакаат да влезат во НАТО и во ЕУ. За тоа да се случи, мора да постои политички консензус, компромис за да се овозможи формирање на стабилна влада“- изјави Хојт.

Во однос на регионот, тој истакна дека од клучно значење е да се продолжи со реформите и да се достигнат европските стандарди, за земјите од регионот да продолжат на евроатлантскиот пат.