ХУМАНИ ЛИ СЕ ГРАЃАНИТЕ: Колку храна донираа за Нова година за сиромашните?

Добивај вести на Viber

За празниците граѓаните имаа можност храната која ќе им остане да ја донираат за социјално загрозените граѓани, кои и онака не можат да си дозволат да имаат богата трпеза.

За време на Новогодишните празници, нѐ контактираа и донираа само 12 домаќинства со вкупна донација од 52 килограми храна, велат од Здружението Љубезност.

Од истата направивме комбинација на оброци за 43 лица (бездомници и сиромашни), додава Тони Станковски, претседател на Љубезност.

„Во однос на лани и пред минатата година, најмала количина на храна собравме и поделивме овојпат. Пред две години имавме објава само на ФБ и собравме поголема количина на храна, овојпат покрај ФБ имавме и објави на национална телевизија во дневните информативни програми, но исходот беше многу послаб. Од она што можевме да го забележиме дека градот беше празен, а тоа можеше да се воочи и на 3 јануари. Многу од граѓаните ги имаа споено Новогодишните со Божиќните празници. Покрај Новогодишните празници, ние како здружение и во текот на целата година подигнуваме и делиме вишок на храна два пати седмично, односно во вторник и ја дистрибуираме храната веднаш до крајните корисници и во петок, којашто е наменета како надополнување на зготвената храна која ја делиме на бездомниците во саботите. Засега немаме услови и можности тоа да го правиме и во останатите денови“, вели тој.

Донираа жители на Скопје, а се планира да се прошири акцијата и во други градови. Таргетирана беше и Струмица, но немаше некој одзив. Мрежата на градови ќе се прошири во иднина. За празниците донирале граѓани од средна класа и оние кои се помоќни финансиски.

Во Македонија преку кампањи се подига свеста дека многу храна се фрла, а истата може да заврши на нечија трпеза.

Франција е на прво место во светот по одржливата политика за храна. Во 2016 година Франција стана првата земја во светот која од супермаркетите побара непродадената храна да ја донираат во добротворни организации, а рестораните да ја спакуваат непродадената храна во кеси кога и да биде побарано од нив доколку не сакаат да плаќаат казни високи до 75.000 евра и две години затворска казна.