И македонската Влада се откажа од ДДВ-то за донации

Добивај вести на Viber

Реакциите на јавноста дадоа резултат - и македонската Влада објави дека се откажува од данокот на додадена вредност на телефонските повици за хуманитарна помош на населението во поплавените региони во Србија и Босна и Херцеговина. „На утрешната седница Владата ќе донесе одлука сите средства кои се собрани преку овие донации, како и ДДВ да бидат пренаменети како донација за настраданите од поплавите. Државата нема да задржи ништо од тоа“, рече владиниот портпарол Александар Ѓоргиев. Освен ова, в четврток ќе се организира голем хуманитарен концерт во спортската сала „Борис Трајковски“, под мотото „Да се обединиме во хуманоста“. Влезниците за концертот ќе чинат 150 денари, а сите пари ќе бидат наменети за помош на настраданите во поплавените региони. „Реализацијата на овој настан е еден мал придонес за надминување на катастрофата со која се соочија нашите соседи“, вели министерката за култура Елизабета Канческа-Милевска. Со свои претстави и концерти за оваа хуманитарна цел ќе се вклучат сите најголеми културни институции во земјава, кои дел од приходите од продажбата на влезниците ќе донираат за помош на настраданите во поплавите.