Добивај вести на Viber
Министерот за информатичко општество и администрација Иво Ивановски нема одговор на прашањето дали до крајот на годината административците ќе го добијат ветеното покачување на платата.
Ивановски денеска немал конкретен одговор дали административците ќе добијат повисоки плати и дали за ветеното покачување се предвидени пари со ребалансот на буџетот, објави
Алсат-М.
Претходно, одговор на ова прашање немаа ниту вицепремиерот и министер за финансии Зоран Ставрески, ниту Сојузот на синдикати на Македонија.
Во предизборната програма на ВМРО-ДПМНЕ се вели дека првите плати, зголемени за пет насто ќе може да се земат веќе следниот месец, односно во октомври.
„Во следните четири години владата предводена од ВМРО-ДПМНЕ ќе ги зголеми платите во јавниот сектор за 5% секоја година, почнувајќи со исплатата од октомври. Вкупното зголемување на платите ќе биде 21,5%. Оваа политика на планирано зголемување ќе се реализира ако не се случи некоја сериозна надворешна криза што ќе влијае врз економската и финансиската состојба на Република Македонија“, стои во програмата на владејачката партија од последните избори.