Иако е скапоцен ресурс, сепак, наплатата на водата за пиење бележи подеми и падови

Добивај вести на Viber

Во текот на изминатата 2021 година, согласно податоците кои ги објавува Регулаторната комисија за енергетика и водни услуги, ефикасноста на наплатата на водната услуга водоснабдување во поголемиот број региони бележи зголемување во споредба со 2019 и 2020 година. Сепак, каратеристично е што во Скопскиот регион каде имало најголема наплата, изминатата и претходната година наплатата е со намалено темпо.

-  Ефикасноста на наплатата за водната услуга водоснабдување во 2021 година бележи зголемување во Вардарскиот, Источниот, Југоисточниот, Полошкиот и Североисточниот регион во споредба со 2019 и 2020 година, додека во Југозападниот, Пелагонискиот и Скопскиот регион бележи благо намалување во споредба со 2019 и 2020 година – се наведува во извештајот на РКЕ.

Дополнително РКЕ утврдил дека има намалување и кај покривањето на трошоците за водни услуги водоснабдување во текот на минатата година споредено со претходните две години.

-  Во Полошкиот и Скопскиот и Југоисточниот регион покривањето на трошоците за водната услуга водоснабдување во 2021 година е на повисоко ниво во споредба со другите осум региони во Македонија - согласно со податоците со кои располага Регулаторната комисија за енергетика и водни услуги.

Варијации во наплатата на водната услуга регистрирало и Здружението на даватели на комунални услуги – АДКОМ во нивната Анализа на состојбите во секторот водни услуги, кои утврдиле дека процентот на наплата кај јавните комунални претпријатија во земајва  се движи околу 80.

-  Средната вредност на процент на наплата на водната услуга водоснабдување е 80,25 отсто во 2019 и 79,78 проценти во 2020 година. Максималната вредност на процент на наплата за 2019 година е 100 отсто во ЈП Комуна – Крушево, ЈПКД Маврово – Маврови Анови и ЈКП Гази Баба - 2007). Во 2020 година 100 отсто наплата имаа ЈКП Шари – Боговиње  и ЈПКД Маврово –Маврови Анови. Минималната вредност на процент на наплата и за 2019 и за 2020 година е 37 отсто и истата е регистриана во ЈПКД Лакавица – Конче. Бројот на ЈКП кои имаат процент на наплата за 2019 година над средната вредност е 20 јавни комунални претпријатија, додека во 2020 година е 24 јавни комунални претпријатија. Од друга страна, бројот на ЈКП кои имаат процент на наплата за 2019 година под средната вредност е 16, а во 2020 година е 12 јавни претпријатија – стои во анализата на АДКОМ.

Согласно нивните податоци најголем процент на наплата на водната услуга водоснабдување во 2019 година има во Скопскиот Регион со 94 отсто, а најмал во Полошкиот Регион 77,13 проценти. Додека во 2020 година најголем процент на наплата на водната услуга водоснабдување, иако намален има повторно во Скопскиот Регион 86 отсто, а најмала во Вардарскиот Регион 73,13 проценти.

-  Во два плански региони има зголемување на процентот на наплата на водната услуга водоснабдување од страна на јавните комунални претпријатија во 2020 година во однос на 2019 година: Југозападен (1,38%) и Полошкиот Регион (0,36%), додека во останатите шест региони има намалување на процентот на наплата на водната услуга водоснабдување од страна на јавните претпријатија.  Во Вардарскиот за -9,86 отсто, во Источниот -0,41 процент, Југоисточниот -3,24 отсто, Пелагонискиот -6,44 проценти, Североисточниот -0,51 отсто и Скопскиот Регион -8,51 отсто – наведува АДКОМ.  

П.О.