ИМ БЕШЕ КОЛЕГА, А СЕГА ГИ ТОРТУРИРА - Синдикатот со жестока реакција за однесувањето на новиот директор на Водовод кон вработените

Добивај вести на Viber

Вработените во ЈП Водовод и канализација Скопје, од 07 часот утринава се соочуваат со тортура од страна на новото раководство на јавното претпријатие, пишуваат во своето соопштение до медиумите од Сојузот на синдикатите на Македонија. 

„Повеќе од една третина од вкупниот број на вработени во претпријатието се засегнати со губење на работните места и незаконски распоредувани на други работни места со Задолженија без право на приговор и без право на жалба што е спротивно и на Закон и на колективен договор и на Уставот на државата.

Новиот В.Д. Директор кој доаѓа од редовите на вработените во претпријатието, со седнувањето на директорското столче веднаш започнал со тортура, освета и притисок кон неговите довчерашни колешки и колеги од само нему познати причини.

Ваквиот реваншизам и тортура врз вработени е најгрубото кршење на работничките права во скопски водовод, за разлика кога во минатиот период директори и од СДСМ, Душко Вескоски од 2017 година и од ВМРО – ДПМНЕ, Златко Перински од 2021 до 2022 година, се почитуваше колективниот договор, се исплаќаа сите додатоци и надоместоци на плата, се зголеми платата на вработените итн.

За СУТКОЗ при ССМ постојат само работници кои редовно одат на работа и ги извршуваат работните задачи согласно Договорите за вработување, ЗРО и Колективните договори, а не како што милува некој да каже работници примени од овој или оној директор.

Ваквиот однос на новиот в.д Директор може да доведе до колапс на водоснабдителниот и канализацискиот систем во Скопје, поради тоа што квалификуваните работници се упатуваат да извршуваат други работни задачи, а дел од нив ги губат и своите работни места.

Синдикатот СУТКОЗ за овие постапки и самоволие веќе пријави до Државниот инспекторат за труд и се разгледува можноста за штрајк согласно Закон и Колективен договор со една цел, зачувување на работните места и стоп на самоволието на новиот в.д Директор“, пишуваат од СУТКОЗ, каде членуваат вработените во ова комуналкно претпријатие.