Инспекција: Затворени две приватни образовни институции за давање дипломи

Добивај вести на Viber

Институтот за бизнис економија во Скопје поради неисполнување на условите е затворен од инспекторите на Министерството за образование, а по претходни контроли на просветниот образовен инспекторат, клуч на врата добила и приватната високообразовна установа за мода сместена во Џепчиште, која со одлука на Влада во 2021 година добила дозвола за работа. 

Од Министерството за обраование потврдија дека ги затвориле бидејќи не ги исполнуваат условите а просветниот инспекторат е во контрола и во други вакви установи. 

„Процесот на затворање на два институти е комплетно завршен, продолжува во овој момент најверојатно во уште три, но и тоа треба да заврши и ќе добиете информација. Дозволете да ги затвориме и, како што кажав, транспарентно ќе објавиме“, изјави Весна Јаневска, министерка за образование и наука.

Дел од универзитетите веќе се под лупа на просветниот инспекторат. Пред неколку денови министерката кажа дека инспекциските контроли утврдиле неправилности на универзитетите во Тетово, Охрид и Струга. Процесот кај дел од нив веќе бил при крај и е почната постапка за наплата на казни на рецензентски комиси, декани и ректори. 

„Кај дел од универзитетите сосема е при крај процесот, односно постапивме со наплата на казни на рецензентски комисии, декани и ректори. Имаше контрола и на Универзитетот во Штип, се  чека извештајот. Сите универзитети, без исклучок, ќе го поминат процесот. Секаде каде што ќе бидат завршени процесите  јавно и транспарентно ќе бидат објавени резултатите“, изјави Јаневска.