ИНВЕСТИЦИИ: Фабрика за автомобилски компоненти ќе никне во охридско-струшкиот регион
Објавено во: Економија 30 Јули, 2015
Виктор Мизо и премиерот Никола Груевски денеска со сопствениците на автомобилската индустрија „ОДВ Електрик“ која потекнува од Германија потпишаа договор за изградба на фабрика во индустриската зона помеѓу Охрид и Струга.
Најавена е инвестиција од 15 милиони евра и нови 1000 вработувања.
Оваа компанија уште лани имаше пробно производство во Охрид и досега има 130 вработени, а фабриката која се планира да вработи етапно околу 1000 нови лица треба да стартува со работа кон средината на следната година.
Задоволство од потпишаниот договор од новите инвестиции изрази премиерот Груевски кој ги потенцираше новите можности за работа и кариера на граѓаните кои се дел од охридско-струшкиот регион.
„ОДВ Електрик“ е уште голем европски производител од автомобилската индустрија која има свои капацитети во Германија, Украина, Унгарија, а во наредниот период и во Македонија. Компанијата изработува разни компоненти за автомобили.
Извршниот директор на „ОДВ електрик“ Лудвиг Батон информира дека како снабдувач на автомобилски компоненти со средина големина во последните седум години двојно го зголемиле својот обрт и оти за понатамошен развој и им бил потребен дополнителен производствен капацитет во Европа. Во производството во погонот во Охрид се вклучени 130 вработени, ангажирани во три смени, а до крајот на оваа година се очекуваат повеќе од 150 вработени.