ИСПОЛНЕТА КВОТА: Нема веќе дозволи за работа на странци во Црна Гора

Добивај вести на Viber

Црна Гора привремено го стопираше издавањето на работни дозволи за странци затоа што квотата за мај веќе е надмината за 1.500 дозволи, иако е само почеток на месецот. Наместо планираните 6.208 работни дозволи за сранци за цел месец мај, Заводот за вработување на Црна Гора само до 5-ти мај издал 7.758 дозволи за работа, објавуваат црногорските медиуми. Драстичното зголемување на бројот на барања за работни дозволи во Црна Гора се должи на приближувањето на новата туристичка сезона, но и на стравувањето на работодавачите дека со новиот закон за вработување на странци, кој веќе е во процедура, правилата ќе станат построги и покомплицирани. Според Данка Четковиќ, раководител на Секторот за односи со јавност и меѓународна соработка во Заводот, стопирано е само издавањето на нови работни дозволи, додека работодавачите кои веќе ангажираат странци нема да имаат проблем да ги продолжат дозволите. Македонија е во првите четири земји од каде доаѓаат најмногу работници во Црна Гора - 6,6% од вкупниот број на странци кои работат во оваа земја. Сепак поголем е бројот на работници од Србија - 43,93%, Босна и Херцеговина - 21,08% и Русија - 13,71%. Преку 80% од издадените дозволи за работа на странци се однесуваат за помошни работи што ги извршуваат неквалификувани работници во градежништво, туризам и трговија. Најмал процент од странците што работат во Црна Гора се со вишо и високо образование - само 5,5% од вкупниот број.